रघुवरजसप्रकास [4] – किसनाजी आढ़ा

— 41 —

अथ मात्रा व्रत्ति वरणण

दूहा
मत्त व्रत्त में सुकव मुण, मात्र प्रमांण मुकांम।
आवै समता आखिरां, वरण व्रत्त जिण ठांम।।१
मत्त व्रत हिक अह मुणी, पढ़ि सौ च्यार प्रकार।
मत्त छंद उप छंद पद, असम सुदंडक धार।।२

छंद चंद्रायणौ*
लग मत्ता चौवीस छंद मत्त लेखजै।
सुज यां अधिका मत उपछंद विसेखजै।।
वरण मत सम नहीं असम पद जांणजै।
बे छंदां मिळ दंडक मत्त बखांणजै।।३

अथ मात्रा छंद तंत्र गमक छंद
पंच मत, गमक सत।
सीत बर, रांम रर।।४

छंद बांम छ मात्रा
छ मत ‘बांम’ समरि स्यांम।
झूठ धंध, मन म बंध।।५

— 42 —

छंद कंता सात मात्रा
कळ सत ‘कंत’, जिण जगणंत।
रट रघुराय, थिर सुख थाय।।६

दूहौ
सात मत्त पद प्रत पड़ै, सुगति छंद सौ थाय।
आठ मत्त अंतह तगण, पगण छंद कहवाय।।७

छंद सुगति
भूप रघुबर, सझत धनु सर।
जूझ मंडे, दैंत दंडे।।८

छंद पगण अस्ट मात्रा
रांम महराज, करण जन काज।
कोट रिव क्रंत, देह दुति वंत।।९

छंद मधु-भार
चव कळ जगांण, मधु भार जांण।
भजि औध भूप, रवि कोट रूप।।
श्रीरामचंद्र, बिबुधेस बंद।
तन दीध तास, जपि क्रीत जास।।१०

— 43 —

अथ नव मात्रा छंद
छंद रसकल़
नौ मात जैरै, गुरु अंत पै रै।
रसकळ सूछंद, भज्जि कवसलैंद।।११

अथ दस मात्रा छंद
छंद दीपक
मुण पाय दह मात, दीपक्क सुखदात।
जीहा अठूंजाम, संभार स्त्री रांम।।१२

इग्यारे मात्रा छंद
छंद रसिक
चव लघु सिव मत चरण।
वळ खट पय तिण वरण।
रसिक जिकण जग रटत।
मुण रघुबर अघ मटत।।
धनख धरण धुर धमळ।
‘किसन’ समर मुख कमळ।।१३

— 44 —

छंद आभीर
जै पय सिव मत जांण।
अंत पयोधर आंण।।
छंद आभीर अछेह।
रट रघुनाथ अरेह।।
हर जस गावण हार।
धन मांनुख तन धार।।१४

बारै मात्रा छंद
उद्धौर
कळ भांण पाय कहंत।
उद्धोर जिण जगणंत।।
रे किसन भजि सियरांम।
धांनंख धर सुख धांम।।१५

त्रयोदस मात्रा छंद
छंद अनांम
तेरै मत्त गुर लघु अंत।
किव छंद अनांम कहंत।।
रट सीता नायक रांम।
करौ चित तणा सिध कांम।।१६

— 45 —

चतुरदस मात्रा छंद
छंद हाकल़
त्रै दुज गुर कळ चवद तठै।
जांणौ हाकळ छंद जठै।।
भव सागर तर रांम भजौ।
तै विण आंन उपाय तजौ।।१७

छंद झंपताल़
गुर अंत मत चवदह गिणै।
भल झंपताळी कवि भणै।।
रघुनाथ जेण रिझावियौ।
पद उरध तै कवि पाइयौ।।१८

पंचदस मात्रा छंद
छंद जैकरी
कळ दह पंच जांण जैकरी
दुज मुर प्रिय अंतै गुरु धरी।।
भज भज सीता राघव भई।
दस सिर जेता अघ हर दई।।१९

छंद चौपई
पद दस पंचह मत्त प्रमांण, जगण अंत चौपई सजांण।
पायौ जै धन मांनव पिंड, आखै राघव क्रीत अखंड।।२०

— 46 —

सौड़स मात्रा छंद
दूहौ
च्यार चतुकळ सोळमत, सगण अंत पय साज।
सिंह बिलोकण छंद सौ, रट कीरत रघुराज।।२१

छंद सिंह विलोकण
धन धन हरि चाप निखंग धरी।
घर सील सधर क्रत ऊंच करी।।
करतार करां जग झौक जपै।
जय क्रती जिकै खळ पाप खपै।।२२

छंद चरना कुल़क
सौ पदकूळ पय मत्त सोळै।
अंतक सूं निरभै हर ओळै।।
जै कज हे किव रांम जपीजै।
जांण करंजुळ आयुख छीजै।।२३

छंद अरिल
दौ लघु अंत पयं मत्त खोड़स।
छंद अरिल्ल विना हर खोड़स।।
केसव नांम विना अणभै कर।
कौसळनंद जनं नरभै कर।।२४

— 47 —

छंद पाद्धरी
अख मत्त सोळ यक जगण अंत।
पाद्धरी छंद कवि जे पढ़ंत।।
राजाधिराज माराज रांम।
ते ताज सीस आलम तमांम।।
‘अरिहंत’ भरत अग्रज अहेस।
जांनुकीकंत मतिवंत जेस।।
तन स्यांम घणा घण रूप ताय।
पट पीत बरण तड़िता प्रभाय।।
आजांणबाहु अद्वितीय अंग।
निज पांण बांण धनु कटि निखंग।।
सीय बांम अंग मुख अग्र सेख।
बजरंग पाय सेवत बिसेख।।
इण रूप ध्यांन निज अवध ईस।
कर भजन ‘किसन’ निस दिन कवीस।।२५

छंद बै अख्यरी
गुरु लघु अनियंम सोळ मता गण।
छंद बै आखरी सोय बिचच्छण।।
दाटक रांम आलाटक दंडण।
हाटक कोट अधीस विहंडण।।
आस्रय आय भभीखण आतुर।
बेख ब्रवी जिण लंक सियाबर।।
एक घड़ी मझ दास उधारै।
धांनुंखधार बडा व्रद धारै।।
सौ नित गाव ‘किसन’ सुभायक।
नाथ अनाथ धणी रघुनायक।।२६

— 48 —

छंद रडु
सप्तदस मात्रा
दूहौ
कीजै दूहौ प्रथम यक, सत्तरह मत्ता पाय।
तिथ रिव तिथ सिव तिथ, सुपय रडु छंद कहाय।।२७

छंद ग्रंथां तरे चूडामण नांम
धारत कर सायक धनुख, त्रेभोयण सिरताज।
भजियां जन कारक अभै, जै राघव माहराज।।
राज भभीखण लाज राखण, सरणागत साधारण।
धनंख सायक भुजां धारण, मह असुर खळ मारण।।
जांनुकीवर मरम जांणंग, तेग अरेसां तायक।।
‘किसन’ भज जन मांन रख के, दान अभै वरदायक।।२८

— 49 —

अथ वीस मात्रा पवंगम छंद

ग्रंथांतरे चंद्रायणौ छंद
दूहौ
त्रे खट कळ लघु गुरु चरण, अंत मत्त इक वीस।
चुरस छंद चंद्रायणौ, आख सुजस अवधीस।।२९

छंद चंद्रायणौ
स्यांम घटा तन रूप विराजत सांमळा।
बेखौ दुपटा पीत छटा जिम बीजळा।।
कट तट ओप निखंग कोट छिब कांमकी।
रूप अनूप सचूप यसी दुति रांम की।।३०

तेवीस मात्रा

छंद महादीप
महदीप छंद तेर है दस मत पय जांणौ।
यण जोड़ सुजस रांम न्रपत उर मझ्झ आंणौ।।
जनपाळ स्री दयाळ सुलख जियगतजांमी।
सरण सधार बिरदधार हणूंमांन सांमी।।३१

छंद हीर
त्रय खटकळ अंत रगण नांम छंद हीर है।
सौ पसु कव धन्य पढ़त कीरत रघुबीर है।।

— 50 —

धरण धनुस बांम पांण बांण दच्छ हाथ है।
भंजण गढ़ लंक भूप गजण दस माथ है।।३२

छंद रोला
औयण मत चौवीस होय, जिण रोळा आखत।
भल कवि जोड़ग छंद मांझ, राघौ जस भाखत।।
गैल औण रज परसत रीजै नारी गौतम।
प्रतिपल ‘किसना’ रामचंद्र सौ भज पुरसोतम।।३३

छंद बथुवा
भव तेरह मत औण, कोय उप दोहा भाखै।
अख रोळा बथु ऊभै, त्रिविध आंनंद बथु आखै।।
दस तेरह मत्त रुद्र रुद्र रुद्रह नव आवै।।
राय बिथु तिण नांम रुद्र दस अंन मत गावै।।३४

अथ छंद काव्य
आद मत्त अगीयार, दुतीय पद तेर मात दख।
काव्य छंद तिण कहत, अवध ईस्वर कीरत अख।।
जिग कोसिक रख जेण, असुर मारीच उडायौ।
मार सुबाह मदंध, प्रगट रघुबर जय पायौ।।३५

दूहौ
मत्त छंद ‘किसनै’ मुणै, निज कीरत रघुनंद।
सुणौ सुकव अखुं सकौ, अब मत्ता उप छंद।।३६

इति मात्रा छंद संपूरण

— 51 —

अथ मात्रा उप छंद वरणण

दूहौ
जिण पय मंदाकिण जनम, अघ नासिणी अपार।
जिण भजतां अघ जाणरौ, विसमय किसुं विचार।।३७

तत्रादि हरि गीत छंद
चव आद खटकळ दुकळ गुरु यक पाय मत अठ वीसयं।
हरि गीत सौ जिण अंत लघु सौ रांम गीत मती सयं।।
बपु स्यामसुंदर मेघ रुचि फबि तड़ित पीत पटंबरं।
सुज बांम चाप निखंग कटि तट दच्छ कर भ्रांमत्त सरं।।३८

छंद रांम गीत
दसमाथ भंज समाथ भुज रघुनाथ दीन दयाळ।
गुह ग्राह ग्रीधक बंध तै गत व्रवण भाल विसाळ।।
सुग्रीव निरबळ राखि सरणै सबळ बाळ संघार।
पह जोय ‘किसना’ नांम परचौ तोय गिरवर तार।।३९

— 52 —

छंद सवैइया
अंत भगण ईकतीस मत्त पद छैस सवैयौ छाजत।
लख कारज तज समर रांम पद बीजां भजतौ मुढ़ न लाजत।।
संत अनेक उधार सियाबर पै सरणा अनाथां पाळण।
गढ़वा जै पढ़ बीज सची गथ जनमां तणा दुख सौ जाळण।।४०

दूहौ
पद प्रत मत गुणतीस पढ़ि, अंत गुरु लघु होय।
राघव जस जिण मझ रटां, कहै मरहट्टा सोय।।४१

छंद मरहट्टा
सीता सी रांणी वेद वखांणी, सारंगपांणी सांम।
मीढ़ न मघवांणी बळ ब्रहमांणी, नहिं रुद्रांणी नांम।।४२
जे अंतर जांमी वार नमांमी, स्वांमी जग साधार।
जोड़ी चिरजीवं पतनी पीयं, सुज सस दीवं सार।।४३

दूहौ
सात चतुकळ चरण मैं, एक होय गुरु अंत।
चतुर पदी कोइक चवै, रुचिरा कोय रटंत।।४४

छंद चतुरपदी तथा रुचिरा
दस माथ विहंडण आसुर खंडण, राघव भूप अरोड़ा।
पाथर रच पाजं समुद्र सकाजं, तै गड हाटक तोड़ा।।
सीताचौं स्वांमी अंतरजांमी रिव कुळ मंडण राजा।
जिण सुजस जपीजै लभ तन लीजै कीजै सुक्रत काजा।।४५

— 53 —

छंद धत्ता
सत दुजबर ठांणौ त्रय कळ आंणौ कहि धत्ता यक तीस कळ।
रटजै मझ राघौ दुख अघ दाघौ फिर तन धारण पाय फळ।।
द्रुम सात बिभेदण क्रमगत छेदण तै जस कह भव सिंधु तर।
सुत स्री कौसल्या तार अहल्या, करुणानिध सौ याद कर।।४६

ग्रंथांतरे धतानंद अन्य विध
दस सात मात्रा पर विस्रांम अंत लघु सतरै मात्रा सौ धतानंद छंद।

छंद त्रिभंगी
दस अठ अठ छामं चव विस्रांमं छंद सुनांमं तिरभंगी।
रघुनाथ समथ्थं हणि दसमथ्थं रखि यळ गथ्थं रिण संगी।
ससिबदनी सीता कंत पुनीता दास अभीता कुळदीता।
‘किसना’ जिण कीता गुण मुख गीता प्रगट पुणीता जग जीता।।४७

खट सद्रस्य छंद लछण

दूहौ
तिरभंगी १ पदमावती २ दंडकळ ३ लीलावती ४।
दुमिळा ५ जनहर ६ छंद दख अै सम छहूं अखंत।।४८

— 54 —

छंद पदमावती
दस वसु खट आठं इक पद पाठं सौ पदमावती छंद सही।
सौ सुकव सुभागी हरि अनुरागी मत लागी जस रांम मही।।
सीता वर सुंदर मह गुण मंदर पाय पुरंदर दास पड़ै।
चव जै जस चारण ‘किसन’ सकारण धारण सौ यक एक धड़े।।४९

छंद दंडकल़
दस अठ चवदेसं दंडकळेसं मत्त बतेसं जेण पयं।
कह जे मझ कीरत पावत स्रीपत लाभ सधारण देह लयं।।
अवधेस अभंगं, जीपण जंगं कोटि अनंगं धारी कळं।
खर दूखर खंडण बाळ विहंडण दाप निवारण पाप दळं।।५०

छंद दुमिल़ा
दस वसुखट ठांणौ फिर वसु आंणौ दुमिळा ठांणौ करणंता।
दसरथ सुत न्रपवर कळख खयंकर, सौ भव दध तिर निज संता।।
रवि कौट प्रकासं जपि मुख जासं, देण अभेपद निज दासं।
निस दिन पत्रासं, हरखि हुलासं, जस प्रतिसासं जपि जासं।।५१

— 55 —

छंद लीलावती
गुरु लघु विण नियमं तीस बि मत्ता।
लीलावती गुरु अंत कहै।
जौ रघुबर गावै सब सुख पावै,
निभय जिकां जम ताप नहै।
सर गिरवर तारे पदम अठारै,
सेन उतारे जगत सखै।
भिड़ रांवण भंजे गढ़हिम गंजे,
अमरां रंजे ब्रहम अखै।।५२

छंद जनहरण
सब लघु पय पय धरि पछ यक गुरु करि,
जळहर कळ सम लछण धरै।
सुज उर दुति सरवर तिम कळ तरवर,
सिध रघुवर सुजस बरै।
हर अकरण करण सरण असरण हरी,
तरण अतर भव जळधि तिकौ।
कट कट अघ दुघट विकट्ट थट अण घट,
झट झट रट रट ‘किसन’ जिकौ।।५३

छंद वरवीर
चव कळ उरोज थळ च्यार वोज,
वरवीर छंद कह यम कव्यंद।
जस वांण जास मधि चित हुलास,
अख पाप नास रघुवंस यंद।
दसरथ कुमार, धनुबांण धार
जुध असुर जार सरणा सधार।
जांनकीनाथ गिरतार पाथ,
सौ है समाथ भव सिंधु सार।।५४

— 56 —

सोरठौ
वीस मत्त विसरांम, दुवै सतर गुरु अंत दस।
तीस सात मत तांम, जिण पद छंद सझूलणा।।५५

दूहौ
आठ पंच कळ पाय यक, आख फेर गुरु अंत।
नांम जेण पिंगळ निपुण, उप झूलणा अखंत।।५६

छंद झूलणा
वेद चव भेद खट तरक नव व्याकरण वळै खट भाख जीहा वखांणै।
भांत पौरांण दस आठ पिंगळ भरथ, उगत जुगतां तणा भेद आंणै।।
राग खट तीस धुनि व्यंग भूखण सुरस पात पद।
जिकै विण समझ चंडूल पंखी जिंही जे न रघुनाथचौ नांम जांणै।।५७

— 57 —

छंद उप झूलणा
सीस दीधौ जिको नांम रघूनाथ सूं,
नैण दीधा जिकौ निरख माधव नरा।
जीभ दीधी जिकै क्रीत स्रीवर जपौ,
होठ मुसुकाय रिझवाय पातक हरा।
हाथ दीधा जिकौ जोड़ आगळ हरी,
उदर परसाद चरणा-अम्रत आचरा।
पाय दीधा जिकै ‘किसन’ पर-दछ,
फिर नाच राघव आगै सफळ कर तन नरा।।५८

छंद मदन हरा लछण
दूहौ
अठ दुजबर खटकळ सुयक, एक हार गण अंत।
मदन हरा सौ छंद मुणि, राघव सुजस रटंत।।५९

छंद मदन हरा
रज पाय परस जिण नार रिखी,
तज देह सिला छिन मांह तरी, रट सौ हरी।
दिन मांन कदन न्रप जनक सदन धनुभंजी,
वदै जग सीय बरी, क्रत उद्धकरी।
आजांनसुकर सर चाप सुधर,
जिण अतुळ पराक्रम वेद अखै, सिस सूर सखै।
‘किसनेस’ सुकव दख सौ निस दिव,
रदि सिं. . . . भाखै, भव कंज भखै।।६०

— 58 —

दूहौ
कर दुजवर नव रगण हिक, चव पै मत चाळीस।
सुकवी खंजा छंद सौ, मुण कीरत लिछमीस।।६१

छंद खंज
रखण जन सरण रघुराज कौसळ कंवर,
धनुख सर धरण कर सकळ सुख धांम है।
भरत्थ अरिहा लछण भ्रात अग्रज सुभग महा,
मन हरण घण रूप तन स्यांम है।
सरल तन सहज दन मुकत दायक सुमत,
गजगमणी जांनकी भांम गुण ग्रांम है।
रात दिन हुलस मन सुजस ‘किसनेस’ रट,
रखण जन मांम तरुकांम रघु रांम है।।६२

दूहौ
बार प्रथम तेरह दुतीय, रगण अंत विस्रांम।
मांझ चरण पचीस मत्त, निज गगनागा नांम।।६३

छंद गगनागा
खळ दळ समर खपावत किव जण गावत कीरती।
सीता वाहर सझतां वसुधा जाहर वीरती।।
‘किसना’ निस दिन जस कर गुणियण जैनूं गावजै।
राघव राजा सौ रट प्रगट उंच पद पावजै।।६४

— 59 —

दूहौ
एक छकळ फिर च्यार कळ, पांच होय गुरु अंत।
अठावीस कळ औण प्रत, द्रुपदी छंद दखंत।।६५

छंद द्रुपदी
जनक सुता मन रंजण गंजण, असुर अगंजण आहवं।
मैं सरणागत कदम सदा मद, मौ लजा रख माहवं।।
दीनानाथ अभै वरदाता, त्राता सेवग तारणं।
तौ निज पायनि मौ दसरथ तण, घण पापां सिंघारणं।।६६

दूहौ
दस दस पर विसरांम चव, मत चाळीस हुवंत।
गुरु लघु अखिर नियम नहिं, उद्धत छंद अखंत।।६७

— 60 —

छंद उद्धत
दळ सझत खळ दाह यभ बाज अणथाह,
गह रचण गजगाह नरनाह रघुनाथ।
सट पटत भर सेस अति चक्रित अरेस,
दिन धूंधळ दिनेस थरराहइ अर साथ।
निहसंत नीसांण ह्वै बाज हींसांण,
सझ काज घमसांण अपांण भड़ ओघ।
नृप दासरथनंद सौ कारुणासिंध,
जस राच राजिंद मुख वाच आमोघ।।६८

दूहौ
दुजबर नव ता पछ रगण, करण ता पछै होय।
अरध फेर गाथा अधर, माळा कहजै सोय।।६९

छंद माल़ा
अवधपति अनम सुज, तेज रवि कौट सम,
सियपति सरम रख लख जनां आधार है आखां।
नृप राघव जगनायक लायक,
भूपाळ लेण जस लाखां।।७०

दूहौ
सात टगण फिर त्रिकळ यक, अंत रंगण इक आंण।
मत सैंताळी पायमें, पंच वदन सौ जांण।।७१

— 61 —

छंद पंच वदन
रघुवर महाराज गाव नहचै यक पळ न लाव,
रंक करै सोई राव सुद्ध भाव सांम रे।
दीनबंधु देवदेव भाखत स्रुति भ्रहम भेव,
जेता जग सौ अजेव गहर गरुड़ गांम रे।
जळद नील देह जेह तड़िता पट पीत तेह,
गोब्यंद सत क्रत गेह सीत नेह संजणं।
राखण मिथळेसराज लाखवात अघट लाज,
करि अमाप सबळ करग भरग चाप भंजणं।।७२

दूहौ
अै मात्रा उपछंद, कहिया मत माफक ‘किसन’।
नहचै सुण रघुनंद, निज सेवगां निवाजसी।।७३
इति मात्रा उपछंद संपूरण।

अथ मात्रा असम चरण छंद वरणण

दूहौ
मरण जनमचौ सळ मिटण, सौ सलभ व्है संभार।
जंम मौ सळ भंजै जिसौ, कौसळ राजकंवार।।७४
नर तन पावै जे नरा, गुण गावै गोब्यंद।
जनम सफळ थावै जिकै, फिर नावै जम फंद।।७५

— 62 —

अथ मात्रा असम चरण छंद वरणण।
तत्रादि दोहा छंद

दूहौ
तेर मत्त पद प्रथम त्रय, दुव चव ग्यारह देख।
अख सम पूरब उत्तर अध, लछण दूहा लेख।।७६

अन्य लछण दूहा
दूहौ
सुज उलटायां सोरठौ, सांकलियौ आदंत।
मध्य मेळ दूहौ मिळै, तव तूंबेरौ तंत।।७७

दूहौ
अजामेळ पर आविया, साठ सहंस जम साज।
नांम लियां हिक नारियण, भड़ सोह छूटा भाज।।७८

सोरठौ
प्रगट ऊब्हांणै पाय, आयौ सोह जांणै यळा।
सिंधुरतणी सिहाय, कीधी धरणीधर ‘किसन’।।७९

सांकळियौ दूहौ
मत जकड़ी भव माग, मकड़ी जाळा जेम मन।
हर द्रढ़ कर पकड़ी हिया, लकड़ी हरी पळ लाग।।८०

— 63 —

दूहौ तूंबेरौ
मेवा तजिया महमहण, दुरजोधन रा देख।
केळा छोत विसेख, जाय बिदुर घर जीम्हिया।।८१

दूहौ
सौ दूहा तेईस सुज, नांम सहत निरधार।
जोड़ देखाऊं जूजुवा, सुणौ रांम जस सार।।८२

कवित छप्पै
भ्रमर १ भ्रमरौ २ सरभ ३ सैन ४,
मंडुक ५ मरकट ६ सख।
करभ ७ नरह ८ सुमराळ ९,
अवर मदकळ १० पयधर ११ अख।।
चळ १२ वांनर १३ कह त्रकळ १४,
मच्छर १५ कच्छप १६ सादूळह।
अहिवर १८ बाघ १६ बिडाळ २०,
सुन कर २१ ऊंदर २२ स्रप २३ थूळहा।।
तेईस नांम दूहां तणै,
वरणे ‘किसन’ बखांणियौ।
यळ ब्रथ जनम खोयौ अवस,
ज्यां हरि नांम न जांणियौ।।८३

उदाहरण

दूहौ
भमर अखिर छाईस भण, चव लघु गुरु बाईस।
यक गुर घट बे लघु बधै, सौ सौ नांम कवीस।।८४

— 64 —

अथ भ्रमर नांम
अख्यर २६ गुरु २२ लघु ४

दूहौ
ना कीज्यौ सैणा नरां, काचौ बीजौ कांम।
राखै लाजा संतरी, राजा साचौ रांम।।८५

अथ भ्रांमर नांम
अख्यर २७ गुरु २१ लघु ६

दूहौ
कोड़ां पापां कीजतां, कोपै धू की नास।
जीहा राघौ जौ जपै, तौ नांही तिल त्रास।।८६

अथ नांम सरभ
अक्षर २८ गुरु २० लघु ८

दूहौ
मांनौ वारंवार मैं, देखे नां नर देह।
गायां स्त्री राघौ गुणां, अै पायां फळ एह।।८७

अथ नांम सैन
अख्यर २९ गुरु १९ लघु १०

दूहौ
भौळा प्रांणी रांम भज, तूं तज झौड़ तमांम।
दीहा छेल्है देख रे, कैसे हूंता कांम।।८८

अथ मंडूक नांम
अख्यर ३० गुरु १८ लघु १२

दूहौ
जाई बेटी जांनकी, रांम जमाई रंज।
भाग बडाई जनकरी, गाई बेद अगंज।।८९

— 65 —

अथ मरकट नांम
अख्यर ३१ गुरु १७ लघु १४

दूहौ
हर मत छाडै रै हिया, लिया चहै जौ लाह।
दिल साचै तेड़ौ दियां, नेड़ौ लिछमी नाह।।६०

अथ करभ नांम
अख्यर ३२ गुरु १६ लघु १६

दूहौ
मांनवियां छाडौ मती, कर गाढ़ौ भज टेक।
जाडौ दळ फिरियां जमां, आडौ राघव अेक।।९१

अथ नर नांम
अख्यर ३३ गुरु १५ लघु १८

दूहौ
रोम रोम मैं रम रि’यौ, देख अखंड दईव।
चोरी जिणसूं नह चलै, जाबक भोळा जीव।।९२

अथ मराळ नांम
अख्यर ३४ गुरु १४ लघु २०

दूहौ
मूरख जाचक जाच मत, जाच जाच जगदीस।
के रंकां राजा करै, एक पलक मझ ईस।।९३

अथ मदकळ नांम
अख्यर ३५ गुरु १३ लघु २२

दूहौ
भख पुंहचावै भूधरौ, अजगर रै अनय्यास।
किम भूलै संतां ‘किसन’, संभरतां सुख रास।।९४

— 66 —

अथ पयोधर नांम
अख्यर ३६ गुरु १२ लघु २४

दूहौ
मन दुख दाधा डौल मत, साधा जग तज साव।
मांनव भव भीता मिटण, गुण सीतावर गाव।।९५

अथ चळ नांम
अख्यर ३७ गुरु ११ लघु २६

दूहौ
सह रांचै जन सादियां, मत बहरौ कर मांन।
कीड़ी पग नेवर झणक, भणक सुणै भगवांन।।९६

अथ वांनर नांम
अख्यर ३८ गुरु १० लघु २८

दूहौ
रै चित व्रत द्रढ़ अेम रख, मूरत स्यांम मझार।
मेल्ह सुरत नट वांस मैं, प्रगट वरत व्है पार।।९७

अथ त्रिकळ नांम
अख्यर ३९ गुरु ९ लघु ३०

दूहौ
केसव भजतौ हरख कर, मत कर आळस मूढ़।
जिण दीधौ मनखा जनम, गरभ कौल कर गूढ़।।९८

अथ मच्छ नांम
अख्यर ४० गुरु ८ लघु ३२

दूहौ
चित जे मत व्है चळ विचळ, भज भज नहचळ भाय।
कूक करै जिण दिन कुटंब, स्रीवर करै सिहाय।।९९

— 67 —

अथ कछप नांम
अख्यर ४१ गुरु ७ लघु ३४

दूहौ
मिळ न पुळ पुळ तन मनख, धनख धरण चित धार।
पात झड़ै तरवर पहव, चढ़े न फेर विचार।।१००

अथ सादूळ नांम
अख्यर ४२ गुरु ६ लघु ३६

दूहौ
धन धन कुळ पित मात धन, नर अथवा धन नार।
रघुबर जस अह-निस रटै, जे धन अवन मझार।।१०१

अथ अहिबर नांम
अख्यर ४३ गुरु ५ लघु ३८

दूहौ
हर हर जप अनम कर हर, परहर अहमत पोच।
व्यापक नर हर जगत विच, अंतर गत आलोच।।१०२

अथ बाघ नांम
अख्यर ४४ गुरु ४ लघु ४०

दूहौ
अमरत दध नह तिय अधर, विधु यिमरत न वखांण।
के जन अजरांमर करण, जस हर यिमरत जांण।।१०३

— 68 —

अथ विडाळ नांम
अक्षर ४५ गुरु ३ लघु ४२

दूहौ
जिण हर सरजत नर जनम, सुजदी रसण समाथ।
कर झटपट कवियण ‘किसन’, नितप्रत रट रघुनाथ।।१०४

अथ सुनक नांम
अख्यर ४६ गुरु २ लघु ४४

दूहौ
परगट कट तट तड़त पट, सरस सघण तन स्यांम।
गह भर समपण कनक गढ़, रहचण दस-सिर रांम।।१०५

अथ ऊंदर नांम
अख्यर ४७ गुरु १ लघु ४६

दूहौ
राघव रट रट हरख कर, मट मट अघ दळ महत।
जनम मरण भय हरण जन, कज भव हर रिख कहत।।१०६

अथ सरप नांम
अख्यर ४८ गुरु ० लघु ४८

दूहौ
हर रिण दस सिर विजय हित, घर निज कर सर धनक।
पढ़त ‘किसन’ किव सरण पय, जय रघुबर जग जनक।।१०७

— 69 —

अथ चरणा दूहा विचार
पहल त्रतीय पद सोळ मत, दुव चव ग्यारह दाख।
चरणा दूहा चुरस कर, भल किव तिणनूं भाख।।१०८

उदाहरण
चरणा दूहौ
दट अणघट अघ विकट दळांरौ, राजा सांचौ रांम।
बळ सौ है दिन जन निबळांरौ, नित जापौ तै नांम।।१०९

पंचा दूहौ लछण
पहलै तीजै बार पढ़, उभये वेद इग्यार।
पंचा दूहा सौ पुणै, सुकव जिके मतसार।।११०

उदाहरण
रांम भजन सूं राता, महत भाग जे मांन।
ज्यां सारीखौ जग में, उत्तम न जांणै आंन।।१११

अथ नंदा दूहा तथा बरवै छंद
मोहणी लछण

दुहौ
धुर तीजै मत बार धर, सुज़ बे चौथे सात।
नंदा दोहा मोहणी, बरवै छंद कहात।।११२

— 70 —

उदाहरण बरवै नंदा
दूहौ
पह ज्यांरा चित लागा, रघुबर पाय।
पुळ पुळ में त्यां पुरखां, थिर सुख थाय।।११३

ग्रंथ चौटिया दूहा लछण
चौटियौ दूहौ
दूहा पूरब अरध पर, अधक बार मत होय।
उत्तरारध दस मत अधक, दुहौ चौटियौ सोय।।११४

उदाहरण
चौटियौ दूहौ
महाराजा रघुवंसमण, सुज रावण समथरा धनु सर पांणां धारै।
वायक सत सीतावरण, नृप नायक रघुनाथ तूं संतां तारै।।११५

अथ दूहा कौ नांम काढण विध
दूहौ
दूहा लघु गिण आध कर, ज्यां मझ घट कर एक।
रहेस बाकी नांम रट, वीदग अघट विसेक।।११६

इति भ्रमरादिक तेवीस दूहा नांम करण विध संपूरण।

— 71 —

छंद चूळियाळा
दूहा अध पर पंच मत, चूळियाळा सौ जांणसु।
कविवर देह लियां फळ एह, दख बद जीहा बाखांण स रघुबर।।११७

छंद निस्रेणका
सझ तेरह धुर फेर दस, जांणौ निस्रेणी।
रिख नारी तरगी हरी, परसत पग रेणी।।
जेण रांम जस दिवस निस, किव ‘किसन’ जपीजै।
लाभ देह रसना समुख, पायांरौ लीजै।।११८

छंद चौबोला
धुर मत्त सोळ अवर चवदह धर, अंत गुरू चौबेल अखै।
सौ भज ‘किसन’ रांम सीतावर, संत तार ब्रद निगम सखै।।
रांवण कूंभ मेघ खर रहचे, कथ सौ बेद पुरांण कही।
बगसी भूपां भूप बभीखण, सरणागत हित लंक सही।।११९

छंद ककुभा
कळ धुर सोळ बार सौ ककुभा, उप चौबोलक कहावै।
सुणजै सौ सुभ छंद, जेण में गुण सीतावर गावै।।
जांमण मरण मरण फिर जांमण, जग नट गौटौ जांणौ।
सौ दुख मेट अखै पद समपण, केसव नांम कहांणौ।।१२०

दूहौ
खट दुजवर कर प्रथम पद, अंत जगण गण आंण।
दूजी तुक दुज सात धर, जगण सिखा सौ जांण।।१२१

— 72 —

छंद सिख
सर धनुख सझत जन सरण,
रख करण सुख रट सु झट रांम।
‘किसन’ किव समर पल यक न कर,
गहर सुण धर विरद भज सुख धांम।।१२२

छंद रस उल्लाला
पनरै तेरैह मत्त पय, छंद उल्लाल पिछांणजै।
रघुनाथ सुजस सौ छंद रच, बीदग मुख वाखांणजै।।१२३

रस उल्लारा भेद

दूहा
रस उल्लाल तिथ तेर मत, छवीस सम पद स्यांम।
स्यांमक रस दूहा सहित, मुण तै छप्पय नांम।।१२८
उलटौ रस उलाल उण, आख वरंग उलाल।
दाख त्रिदस फिर पंच दस, तुक बिहुंवै पड़ताळ।।१२५
पनर पनर मत दोय पय, कांम उलाल कहंत।
यण विध छंद उलालरा, भेद पांच भाखंत।।१२६

अथ माहा छंद लछण
प्रथम त्रीये मत बार पढ़, अख पद बियै अठार।
चौथै पनरह मात रच, यम गाथा उच्चार।।१२७
सात चतुर कळ अंत गुरु, जगण छठे थळ जोय।
उत्तर दळ छठ्टे सुथळ, दुज कै यक लघु होय।।१२८
तीस समत पूरब अरध, उत्तर सत्ताईस।
सत्तावन मता सरब, आखव नांम छवीस।।१२९